12.10.2011....

Lónsball, Atlavík, Músíktilraunir, Vogur, bílskúrinn í Höfn, ball í Sindrabæ.. og ekki endilega í þessari röð...

Þetta er það sem rennur um huga minn núna þegar ég minnist vinar míns Jóns Ægis Ingimundarsonar á dánardægri hans 12.nóv..

Verslunarmannahelgin 1999 (að mig minir) Atlavík á öðrum degi í sól og sumaryl.. skálað og haft gaman alla dagana.. við vorum reyndar stundum í misjöfnu ástandi.. en hvað með það.. við vorum að skemmta okkur og það gekk bara vel.. Man sérstaklega vel eftir því þegar Ægir reyndi mikð að fá Steinar bassaleikara í SúEllen til að minka bassan í hljóðkerfinu.. Stóð uppvið sviðið vel kenndur og kallaði Steinar.. STEINAR.. það er of mikill bassi.. ÞAÐ ER OF MIKILL BASSI.. En Steinar, Gummi Gísla og félagar í SúEllen tóku ekki eftir eða létu eins og þeir tækju ekki eftir neinu en við skemmtum okkur yfir því engu að síður

Lónsball.. Þegar við spiluðum með Stjórninni.. Kalli Elvars var að vinna svo að það dæmdist á okkur hona að syngja... Þetta var sumarið sem GCD var uppá sitt besta.. og auðvitað spiluðum við Mýrdalssandinn og fleiri slagara með þeim.. ásamt fullt af öðrum lögum... Djöfull var það gaman... Bara tær snilld alveg hreint.. held að þetta sé eitt af bestu kvöldum ævinar og allir snillingarnir samankomnir ég, Gummi, Róbert og að sjálfsögðu meistarinn sjálfur Jón Ægir.... Kalli kom svo reyndar í restina.. frábært kvöld í alla staði.. Og við vorum ekki síðri en Stjórnin.. eða í það minnsta í minningunni..

Múskíktilraunir.. við vorum ellismellirnir.. eða í það minnsta Ægir, Kalli og Kristján Ingimars... Sennilega hækkuðu þeir meðalaldurinn um svona 20%... en það var allt í lagi.. við skemmtum okkur gríðarlega vel... Við meikuðum það ekki en djöfull hvað var gaman... algjör snilld... Og heimferðin.. Hún var snilld.. stoppað í Paradísarhelli og fleiri stöðum sem eru ekki venjulega á dagskrá svona drengja eins og okkar... Torfkirkjan á Núpsstað.. Lómagnúpur... Jölulsárlón.... og fleiri staðir... Magnað..

Bílsskúrinn í Höfn.. takið eftir.. í Höfn ekki á Höfn.. Þar var nú margt brallað en þó aðallega spilað.. en stundum var komið saman og tekið í hljóðfæri og tæmdar dósir.. oft glatt á hjalla... Og alltaf var meistarinn hrókur alls fagnaðar...

Ball í Sindrabæ.. Gítarinn minn var svo falskur að Gummi fékk nóg og kippti honum úr sambandi.. Ægir hló.. Lúlli staðarhaldari kom og hvartaði yfir því að glösin væru að hristast niður úr hillunum.. Ægir hló ennþá meira... Enduðum svo kvöldið á röltinu um götur Hafnar í Hornafirði fram undir morgun.. en svo sváfu allir þegar ég keyrði heim.. á gömlum lélegum sendibíl sem við fengum lánaðan hjá Snarvirkja.. (Ef ég man rétt)...

Þetta eru bara nokkrar minningar sem ég vildi deila með ykkur á þessum degi.. Væri kanski ástæða til að hamra svona niður á afmælisdegi meistarans.. en einhvernveginn þá varð ég að skrásetja þetta í kvöld því mér varð hugsað til þessa dags fyrir ári síðan..
Skarð sem skilið er eftir með þessum hætti af svona mönnum verður seint fyllt..
En minningin um góðan dreng lifir í hugum okkar og minningum..


Allir geta eitthvað en engin getur allt.....

Ég fylgdist með umræðu á Alþingi í kvöld sem leið. Þar var umræðuefnið stefnuræða forsætisráðherra. Margar góðar ræður voru fluttar, sumar voru mjög alvarlegar, aðrar heldur léttari eins og gengur og gerist á hinu háa Alþingi.

Misjöfn var sýn manna á málefni líðandi stundar og efnhagsmálin og stöðu okkar þjóðar. Ýmist er allt á vonarvöl eða allt í lukkunar velstandi. Sumir töluðu um fortíðina og hvað það er sem veldur núverandi stöðu í samfélaginu, aðrir töluðu um skamsýni og skort á dómgreind, aðrir töluðu um spillingu í fortíð og nútíð og svo mætti lengi telja.

En hvað er málið eða mál málana um þessar stundir??

Alþingi hefur sett mikið niður undanfarin misseri, virðing fyrir þingi er sáralítil, traust er horfið og í raun er Alþingi umboðslaust eins og staðan er í dag engin er ánægður með þá þróun sem þar hefur átt sér stað.
Því ætti mál málana á þingi í dag að snúast um það eitt að endurvinna traust og endurvinna virðingu endurvinna þann sess sem þjóðþingið á að hafa hjá okkur sem veljum fólk til starfans á fjögura ára fresti.

En hvernig er það hægt??

Með sammvinnu en ekki sundrungu, með auðmýkt í stað hroka, með málefnalegri umræðu í stað persónulegra skota, með að tala íslensku en ekki undir rós, með því að vinna góðum málum brautargengi sama hvaðan þau koma og með því að ná sátt um mikilvæg málefni en ekki keyra þau í gegn með látum og offorsi.

Þingmenn skutu föstum skotum, skotum sem eru ekki partur af málefnalegri umræðu, skotum sem ekki liðka fyrir um lausnum og úrvinslu vandamála, skotum sem við sem samfélag höfum ekki efni á eða tíma til að eyða í.

Ég ætla ekki að leggja einvhern dóm á það hvaða þingmenn og konur eiga þessi skot skilinn eður ei, en ég veit hinsvegar að þetta ágæta fólk hefur umboð þjóðarinnar til að vinna þarna, það umboð sem er endurnýjað á fjögura ára fresti og þetta sama fólk ætti að hafa á því vit og rænu að einbeita sér að úrlausn vandamála í stað þess að berja sér á brjóst og fara með miklar ræður um eigin ágæti og annara dugleysi.

Það má vel vera að einhver fótur sé fyrir því að þingmaðurinn Jón eða þingkonan Gunna séu ekki sínu verki vaxin, en það breytir ekki því að þau hafa sitt umboð hvort sem okkur líkar betur eða verr og það ætti að vera útgangspunktur hjá öllum 63 að gera sitt besta til þess að vinna í vandamálum þjóðarinnar og vera lausnarmiðuð takast á við vandamálin í samstíga í stað þess að eyða orku og tíma í plammeringar misgáfulegar.

Sumir þingmenn eins t.d. Sigmundur hvöttu einmitt til þess að unnið væri í vandamálunum í stað þess að einbeita sér að því að vera með hnútukast úr ræðustól og fengu þeir prik í kladdanum hjá mér, þeir sem skutu sem fastast á aðra flokka eða aðra þingmenn mistu prik á móti.

Við komum ekki til með að ná tökum á okkar vanda nema með samstilltu átaki og það er það sem nýbyrjað þing á að snúast um.

Ég er einnig að velta fyrir mér hvernig ég á að túlka mismunandi sýn ræðumanna á stöðu mála og held að þeir hafi flestir iðkað þá miklu list að draga einungis fram þann part sannleikans sem hentaði þeirra málstað, en það að segja hálfan sannleikan er oft meiri lýgi en en það að segja algjörlega ósatt og því ættu okkar ágætu ráðherrar og þingmenn að venja sig af því að skreita mál sitt með hálfum hagtölum, þeim helming sem þeim hentar.

En hvað um það, ég er ekki viss um að vinnubrögð þarna inni breytist nokkuð, en maður verður að lifa í voninni um að það gerist...


mbl.is „Leitum skynsamlegustu lausnarinnar“
Tilkynna um óviðeigandi tengingu við frétt

Það er nú ekki....

Mikið.. Er þetta ekki maðurinn sem kom á "friði" í borginni.. ??

Er ekki miklu ódýrara að borga uppistand... ég meina einum borgarstjóra sæmilega góð laun, heldur en að borga nokkrum Borgarstjórum biðlaun... ??

Þetta er klárlega góður bissness...Woundering


Þetta er spurning um að....

Það eru ekki til peningar fyrir nýjum Norfjarðargöngum, segir innanríkisráðherra ítrekað, en það eru til peningar til að lána í þessa framkvæmd... ?? Að vísu verður það endurgreitt.. kanski... Þarna má vel bora mín vegna.. en það á að vera á hreinu um hvað er verið að ræða.. rískisframkvæmd eða einkaframkvæmd.. það er ekki á hreinu hér.. og svo er það rétt sem Guðfríður Lilja segir að þetta bitnar á öðrum framkvæmdum því ekki er framkvæmt annarsstaðar á meðan peningar eru bundnir í þessu næstu 10 árin hið minnsta....
mbl.is Skattgreiðendur verði ekki blekktir
Tilkynna um óviðeigandi tengingu við frétt

101.339.-

Heimsóknir á fimm árum.. en það eru fimm ár í dag frá því að ég fór að tjá mig hér á þessum vettvangi...

Í fyrstu átti þetta að snúast fyrst og fremst um pólitík, vangaveltur af minni hálfu um málefni þess vattvangs, en fljótlega var þetta frekar útrás fyrir mínar skoðanir á málefnum líðandi stundar. 

Yfirleitt hefur mér tekist (að eigin mati) að vera nokkuð málefnalegur í mínum skrifum hér inni, oftast hefur mér tekist að vera ekki með sleggjudóma eða skítakast, þó að stundum hafi nú ekki verið mikill afgangur í skrifunum og eflaust hef ég einhvern tímann vegið að einhverjum eða í það minnsta nær  en ég hefði átt að gera.

En hvað um það, ég reyni þó í það minnsta að setja mig í spor þeirra sem ég hef hér fjallað um, og reynt að sjá málin frá fleiri en einni hlið og sjálfsagt hefur það gengið misvel og misjafnt er augað sem les eins og allir vita.  Ég hef ekki legið á mínum skoðunum og stundum hlotið bágt fyrir, en hvernig má það vera öðruvísi?? Við getum aldrei öll orðið sammála um alla hluti.

Reyndar hefur þessi vettvangur vikið að hluta til fyrir hinni alræmdu fésbók, en sumir nota þennan vettvang meira í dag til ítarlegri vangaveltna en bókin þá, svona meira innihald en magn og aðeins meiri vinna sett í það sem pistlast hér inn..  Í það minnsta er það þróunin hjá mér og mér hefur sýnst að það sé þróunin hjá flestum öðrum einnig.

Mér hefur reyndar fundist halla verulega undan fæti á netmiðlum landans undanfarin misseri.  Mjög auðvelt og aðgengilegt er í dag að setja inn athugasemdir við fréttaflutning vefmiðla, það varð auðvelt með tilkomu bloggsins, en ennþá auðveldar er það orðið nú með tengingu við alla samskiptamiðlana sem of mikið mál er að tala um hér.

En það réttlætir ekki þá leið þróun sem orðið hefur á munnsöfnuði (ef það er hægt að tala um munnsöfnuð þegar netið og lyklaborð er notað) netverja undanfarin misseri.

Orð eins og asni, vitleysingur, fábjáni og eitthvað í svipuðum dúr eru nánast orðin hrósyrði í dag miðað við margt það sem maður les í athugasemdum við fréttir netmiðlana þessa daga.  Mun verri og öfgafyllri munnsöfnuður er viðhafður um fólk sem er í skotlínu og þá má einu gilda hvort að um sé að ræða pólitíkusa eða Jón og Gunnu á götunni, ef þú ert í fréttum á einhvern hátt þá er einfaldlega drullað yfir þig af mannvitsbrekkum veraldarvefsins.  Ég leyfi mér að segja "drullað" því að það er það lýsingarorð sem kemst næst því að lýsa hvernig orðaskakið og skeytin eru orðin.

Síðast í gær fannst einum einstakling það sjálfsagt mál að kallað yrði eftir Breivikum Íslands, til að hreinsa til og taka til hendinni.  Ég veit ekki hvað viðkomandi aðila gekk til að kalla eftir því að einhver ógæfumaður með geðraskanir tæki það upp með sér að ganga berserksgang af Norskri fyrirmynd hér hjá okkur..

Er bara í lagi að segja hvað sem er í skjóli nettengingar og lyklaborðs??

Fólk sem á sér einskins ills von er skotið niður af sjálfskipuðum dómurum netsins, málefni skipta engu máli lengur, það eina sem gildir er að skjóta nógu fast á valda einstaklinga og þá telur viðkomandi sig vera að fara með faglegt og gott mál..

Hýðum þennan kjöldrögum hinn, megi þessi týnast út í hafsauga og svo framvegis eru algengari setningar en góðu hófi gegnir og manni finnst nóg um.

Ég sagði hér í mínum inngangi að ég hefði reynt að feta þann stíg að tala um málefni en ekki menn og í langflestum tilvikum hefur það tekist.  Þegar það hefur ekki tekist þá hef ég alltaf séð eftir skrifunum en ég hef ekki fjarægt neitt sem hér hefur farið inn því að ég vil að þeir fáu sem leggja leið sína hingað inn sjá hlutina eins og þeir eru. 

En hvað um það.. það er fallegur vordagur hér hjá okkur Reyðfirðingum, mætti vera aðeins hlýrra en góðir hlutir gerast hægt og áður en varir kemur sumar.

Ég óska þeim sem hingað inn nefi stinga hvort sem þeir deila mínum skoðunum eður ei, góðs sumars og vona að komandi mánuðir og ár færi þeim gæfu og gleði. 

Og að lokum vil ég minna á að aðgát skal höfð í nærveru sálar, bætum umræðuna um málefni og menn og reynum að vera málefnaleg og kurteis..

Góðar stundir...

 


Þetta eru ekki...

Nýjar fréttir...

 

http://eirag.blog.is/blog/eirag/entry/11096/
mbl.is Allir út með ruslapoka
Tilkynna um óviðeigandi tengingu við frétt

Segið svo að ....

Héðinsfjarðargöng séu ekki að skila neinu...

Það má fullljóst vera að hluti af þessari aukningu má rekja beint til þeirra vegabóta sem átt hafa sér stað þarna fyrir norðan.  Kominn þægileg og góð hringleið þar sem áður var botnlangi.

Maður spyr sig hvort ekki sé ástæða til að dusta rykið af gömlum hugmyndum um Samgöng hér fyrir austan, það yrði sennilega mikil lyftistöng fyrir Seyðisfjörð og Neskaupsstað að fá það í gegn, sumartraffíkin myndi aukast verulega ef að mönnum bæri gæfa til þess að koma þeim á koppinn, auk þess sem vetrarlokanir myndu heyra sögunni til.

Einnig væri á veturna samnýting skíðasvlæðanna orðinn raunhæfur valkostur þar sem vegalengd milli þeirra yrði helmingi minni og að stórum hluta innan dyra...

Held að þetta myndi vera eitt af þeim skrefum sem þarf að stíga til að gera Austurland að einu þjónustu og atvinnusvæði, nú eru t.d. milli 15 og 20 manns sem sækja vinnu hingað niður í Fjarðabyggð.

En við erum nú væntanlega ekki að horfa uppá slíkar framkvæmdir á næstunni því miður.


mbl.is Síldarminjasafnið skuldlaust
Tilkynna um óviðeigandi tengingu við frétt

Af holum fjallgörðum..

Jarðgöng.. Nauðsyn eða tískubylgja…??

Mikið hefur verið skrafað og skeggrætt um jarðgöng og jarðganaframkvæmdir meðal landans undanfarin misseri og ár. Sýnist sitt hverjum um hvar og hvenær og jafnvel hvernig eigi að gata fjallshryggi af ýmsum stærðum og gerðum.

Sennilega hafa augu manna hér opnast fyrir því að eftir að jarðgöng undir Hvalfjörð og Vestfjarðagöngin voru opnuð að jarðgöng væru alvöru samgöngubót, en ekki litlar og illfærar holur sem væru lítið minna hættulegar en fjallvegurinn sem þau leystu af hólmi.

Margar lærðar skýrslur hafa verið lagðar fram um málið af hinum ýmsum aðilum og gjarnan er tekist á um staðsetningu og forgangsröðun, enda vill hver fá í sinn bakgarð jarðgöng af nýjustu sort, til að stytta akstursleiðir og bæta samgöngur milli staða árið um kring.

Sennilega hefur sú umræða hvergi verið meiri en hér fyrir austan, sérstaklega í kúlulánasamfélaginu fyrir hrun, en þá uxu peningar á birkitrjám og smjörið fossaði af öllum stráum og því lítið mál að breyta íslenskum fjallgörðum í konsertflautandi gatasikti með tilheyrandi styttingu vegalengda og bættum samgöngum.

En svo komi hrunið, birkivaxnir peningar og stráarsmjörið var sjónhverfing ein og því ljóst að ekki væru fullir vasar fjár til slíkra framkvæmda. Því þarf að vanda til verka og velja af kostgæfni þá kosti sem fara fyrstir í framkvæmd þegar fjármagn er af skornum skammti, en engu að síður nauðsynlegt að halda áfram uppbyggingu vegakerfis okkar Íslendinga.

Norðfjarðargöng ber oft á góma ásamt göngum undir Fjarðarheiði, en sennilega eru það þeir kostir hér fyrir austan sem oftast eru nefndir ásamt göngum undir Hellisheiði eystri.

Ég ætla ekki að taka afstöðu til þess hér í þessum pistil hver á að koma fyrstur og hver síðastur, en vil nefna nokkra kosti sem skoðaðir hafa verið undanfarin ár svona til fróðleiks og gamans, heimildir eru af heimasíðu Vegagerðarinnar, þar sem allir þessir kostir eru túndaðir í nokkrum skýrslum. Við hefjum leikinn nyrst við Hellisheiði eystri og endum suður í Lóni.

Hellisheiði eystri 7km. (Hérað – Vopnafjörður)  Þessi göngu myndu tengja saman norðurbyggðirnar og miðausturland. Heilsársvegalengd milli Vopnafjarðar og Egilsstaða yrði innan við 90 km í stað 140 (að mig minnir) Austurland myndi í raun stækka til norðurs við þessa framkvæmd en Vopnafjörður og byggðirnar þar norðan af hafa ekki haft mikla tengingu austur eftir vegna skorts á samgöngum.

Ókostir eru varla nokkrir, þó gæti jarðfræði á svæðinu verið snúinn, en um er að ræða forna eldstöð og jarðfræðingar hafa bent á möguleg vandkvæði á því að bora í gegnum eldstöð, en það má sjálfsagt leysa með góðum vilja og nútíma tæknilausnum og svo leiða nánari rannsóknir jafnvel í ljós að þetta er ekkert vandamál.

Seyðisfjarðargöng 12-14km (Seyðisfjörður – Hérað undir Fjarðarheiði)  Tenging okkar við Evrópu liggur yfir Fjarðarheiði eins og staðan er í dag og sennilega er þetta snjóþyngsti fjallvegur hér Austanlands með tilheyrandi ófærð og dýrri vetrarþjónustu. Frá Seyðisfirði sækja margir vinnu yfir Fjarðarheiði niður á firði og til Héraðs.

Helsti ókostur þessara ganga er lengd þeirra en reikna má með að göngin verði ekki undir 12km en það er vissulega nokkrir kostir þar í stöðunni og möguleiki á styttri göngum.

Mjóafjarðargöng 12-14km. (Norfjörður – Mjóifjörður – Seyðisfjörður)  Myndi leysa af hólmi Fjarðarheiðna í það minnsta að hluta, myndi tryggja að þjóðbraut Íslendinga til Evrópu væri í lagi, að því gefnu að Norfjarðargöng væru einnig til staðar. Seyðisfjörður og Norfjörður væru með hringtengingu í alfararleið, með þeim fjölmörgu möguleikum sem því fylgja. Mjóifjörður væri orðin góður búsetukostur í stað hnignandi byggðar með litlar sem engar samöngur yfir vetrarmánuðina.

Ókostir eru sennilega helst vegalengdir, en gera má ráð fyrir því að þessi göng yrðu um 2x 7km.

Norfjarðargöng 7km. (Eskifjörður – Norfjörður)  Engin efast um nauðsyn þessara ganga, gömlu göngin eru í liðlega 600 metra hæð yfir sjó, einbreið og orðin ákaflega léleg með tilheyrandi grjóthruni. Fjórðungssjúkrahús Austfirðinga er á Norfirði, sem og Verkmenntaskóli Austurlands. Fjöldi manns, sennilega á annað hundrað, sækir vinnu yfir Oddskarð á degi hverjum bæði til og frá Norfirði og Oddskarðið er snjóþungt með mikilli og dýrri vetrarþjónustu. Göngin yrðu svipuð framkvæmd og Fáskrúðsfjarðargöng um 7 km löng. Fullrannsökuð og í raun tilbúinn í útboð.

Ókosti get ég ekki fundið og flestir eru þeirrar skoðunar að þetta sé ein brýnasta samgöngubót hér Austanlands.

Héraðsgöng 6-8km. (milli Fjarða og Héraðs staðsetning óviss.)  Þessi göng myndu leysa Fagradal af hólmi í það minnsta að hluta. Nokkrir staðir hafa verið nefndir, t.d. undir Eskifjarðarheiði og undir Mjóafjarðarheiði.

Nokkuð ljóst má vera að þessi jarðgöng og Fjarðaheiðargöng verða seint bæði að veruleika, þarna þyrftu menn að velja á milli þeirra tveggja kosta. Lengd þessara ganga yrði á bilinu 5-7 km. eftir staðsetningu.

 Stöðvarfjarðargöng 4,8km. (Fáskrúðsfjörður – Stöðvarfjörður)  Þessi göng myndu stytta þjóðveginn um firði um 15 kílómetra, auk þess sem að vegur um sunnanverðan Fáskrúðsfjörð myndi leggjast af sem aðalleið, en hann er nú í dag kominn að fótum fram og þarfnast úrbóta. Stytting fyrir Stöðfirðinga yrði hér ekki eins mikil, en þar sem göngin koma innar en núverandi vegur yrðu afleggjari út á Stöðvarfjörð og stytting fyrir þá norður úr yrði um 7 km.

Ekki verður séð að þessum göngum fylgi miklir ókostir, nema þá helst að taka byggðarkjarna úr alfaraleið er oft álitinn ókostur.

 Kambanesgöng 4km. (Stöðvarfjörður – Breiðdalsvík.)   Hér er um að ræða göng sem myndu leysa af hólmi Kambanessriður (Kambaskriður) og stytta vegalengd milli Breiðdalsvíkur og Reyðarfjarðar um 8km. Vegur sem er um Kambaskriður myndi leggjast af nema sem útsýnisleið, en um er að ræða brattar skriður, sem þó hafa nýuppbyggðan og góðan veg.

Ókostir eru helst lítil stytting með miklum tilkostnaði, og nýbúið er að byggja upp vegin um skriðurnar, milli staðanna.

Berufjörður 6-7km.   Þessi kostur er ekki oft nefndur, en hann er vænlegur fyrir margra hluta sakir. Stytting er umtalsverð eða allt að 37 km yrði ysta mögulega leið fyrir valinu. Aðalflutningsleið til og frá Austurlandi liggur um firði, nokkuð margir sækja vinnu frá Djúpavogi austur á firði, og þessi göngu myndu á sama hátt og Hellisheiðargöng draga austfirðinga nær hvor öðrum.

Ókostir eru þeir helstir að þennan kost er ekkert búið að rannsaka og neðansjávargöng eru yfirleitt um 30-50% dýrari en göng í gegnum fjallgarða ofansjávar.

Öxi 8-10km.   Göng undir Öxi hefði í för með sér ótvíræða kosti. Umdeildur fjallvegur myndi leggjast af en vegalegngdir myndu ekki styttast mikið frá því sem nú er en ferðatími myndi styttast og öryggi yrði umtalsvert miklu meira.

Hér er það svipað uppi á teningnum og með Fjarðaheiðargöng, en gera má því skóna að ekki yrði borað styttra hér en um 10 km, nema með því að fara með gangamunan í töluverða hæð.

 Berufjarðarskarð 3-4km (Berufjörður-Breiðdalur) Grundvöllur þessara ganga yrði væntanlega áframhald og að önnur göng kæmu til undir Breiðdalsheiði. Með þeim tveimur framkvæmdum næðist töluverð stytting á milli Djúpavogs og Héraðs en áhrifin austur um firði yrðu hverfandi í kílómetrum talið. Þarna má búast við því að menn standi frammi fyrir svipuðum valmöguleikum og norðar á Austfjörðum, en göng undir Öxi og þessi göngu yrðu sennilega aldrei bæði að veruleika, það sama á við um göng undir Berufjörð. Það má því segja að án tilliti til kostnaðar en einungis með því að velta möguleikum fyrir sér þá séu valkostir við Berufjörð ansi margir.

Breiðdalsheiði 2-3km (Skriðdalur-Breiðdalur) Farið yfir þessa kosti hér í næstu göngum á undan (Berufjörður Skriðdalur) Stytting milli Djúpavogs og Héraðs yrði svipuð og ef um veg yfir Öxi væri að ræða, fer þó töluvert eftir staðsetningu. Það má reikna með því að þessi tvennu göng yrðu ein framkvæmd ef af yrði.

Lónsheiði. 6-7km (Álftafjörður – Lón) Stytting yrði um 15km. á vegalengd milli Hafnar og Djúpavogs, vegur um Þvottár og Hvalnesskriður myndi leggjast af sem heilsársvegur en í mínum huga yrði ákfalega mikilvægt að hann fengi áfram að njóta sín sem túristaleið, þar sem útsýni úr skriðunum er stórfenglegt.

Ekki er séð að á þessu yrðu neinir ókostir, stytting og mun betri og tryggari samgöngur. Þó hafa menn velt upp spurningum um hugsanlega hæð á gangamunna, sérstaklega Álftafjarðarmegin, en það er í það minnsta ekkert fast í hendi með það.

Aðrar styttingar án gangaframkvæmda. Hér hefur verið skautað yfir flesta þá kosti sem hafa einhverntímann verið nefndir til sögunnar í umræðunni um samgöngumál í okkar ágæta fjórðungi, en oft hafa átök verið umtalsverð í þeim málaflokki hér fyrir austan.

Aðrar styttingar eru að sjálfsögðu mögulegar, en þá ber helst að nefna Hamarsfjörð og Álftafjörð, nokkrar leiðir yfir þessa firði ættu að vera mögulegar því báðir eru þeir grunnir og því ekki ómögulegt að fara yfir þá bæði innarlega á leirum og utar með meiri mannvirkjum.

Brú yfir Berufjörð hefur einnig verið nefnd og lítið mál er að ná þó nokkurri styttingu yfir þann fjörð bæði á leirum innst í firðinum, sem og utar ef vilji stendur til þess.

Einnig eru hæg heimatökin í því að stytta veginn um Lón um eina 15 kílómetra með því að færa hann utar í sveitina. Við allar þessar styttingar um firði og Lón, sem hér eru nefndar myndu, einar 10 einbreiðar brýr heyra sögunni til og það er mikill plús í því að bæta umferðaröryggi.

Að lokum Fleiri möguleikar til styttinga eru vissulega til en þessir, en þeir eru sumir hverjir frekar fjarstæðukenndir en svona til gamans þá má nefna göngu undir Þórudalsheiði, en þar er möguleiki á því að leiðin milli Reyðarfjarðar og Djúpavogs yrði um 75 kílómetrar um Axargöng eða undir Breiðdalsheiði og Berufjarðarskarð.

Einnig er hægt að nefna þann kost að bora frá Seldal í Reyðarfirði yfir í Norðurdal í Breiðdal, en það yrðu um 8 kílómetra löng göng og síðan bætti bora áfram til suðurs milli Breiðdals og Norðurdals og þaðan undir Berufjarðarskarð með þessu móti yrðu ekki nema 35-55km. frá botni Reyðarfjarðar í Berufjarðarbotn eftir því hvaða leið yrði fyrir valinu.

Það verður þó að teljast að þessir möguleikar séu ákaflega fjarlægir í tíma, ef að þeir eiga þá nokkurn möguleika yfir höfuð, en þeir fá að fljóta hér með svona til gamans.


Nú líst mér á...

Ég held að Hjálmar hafi hitt naglann á höfuðið í þessu máli.. Auðvitað á að sleppa því að mynda meirihluta, enda á það að vera algjörlega óþarft í sjálfu sér.  Sú aðferðarfræði sem tíðkast hefur í íslenskri pólitík og víðar að alltaf þurfi að stjórna í krafti meirihluta er úrelt og komið að því að vinna á öðrum nótum.

Meirihlutaræðið sem við þekkjum auðveldar foringjaræði og eykur líkur á spillingu og gengisfellir oft (ekki alltaf) góð mál sem koma frá "röngum" flokki. (minnihluta)

Hversvegna er bæjarstjórn ekki starfhæf nema með meirihluta.. ?? Er þetta ekki sama fólkið sem situr á stólunum, breytist eitthvað í afstöðu þeirra við það að starfa sem einn hópur frekar en tveir.. ?

Ég get nefnt dæmi um það hvernig meirihlutaræðið getur virkað.

Eitt sinn var ónefndur sveitarstjórnarmaður á tali við sveitunga sinn.  Og voru þeir að ræða um daginn og vegin þegar barst í tal örlítið vandamál sem dóttir sveitungans átti við að glíma, og sveitarfélagið gæti í sjálfu sér leyst með lítilli samþykkt.  Taldi sveitarstjórnarmaðurinn að það væri nú lítið mál og auðfengið enda væri ekki um ólöglegan gjörning að ræða fyrir sveitarfélagið og taldi hann víst þar sem hann væri í sitjadi meirihluta að þetta fengist samþykkt.

Líður nú nokkur tími og mál dóttur sveitungans er tekið fyrir af sveitarstjórn.  Kemur í ljós í ferlinu að málið sé fordæmisgefandi og muni að öllum líkindum verða stærra í fyllingu tímans og fleiri dætur eða synir sveitunga munu sækja svipaðan greiða til sveitastjórnar í fyllingu tímans.

Þrátt fyrir þetta vill sveitarstjórnarmaðurinn sækja það stíft að hans loforð við sveitungan verði uppfyllt, hann vill eðlilega ekki ganga bak gefnu loforði og málið er tekið tvisvar fyrir í sveitarstjórn, en á endanum ákvað sveitarstjórn þverpólitískt að ekki yrði að svo stöddu farin sú leið sem sveitarstjórnamaðurinn vildi.

Þarna treysti viðkomandi því að hans mál yrði samþykkt þó að það væri byggt á veikum grunni og væri í raun íþyngjandi fyrir sveitarfélagið og þar með íbúana.  Í krafti sinnar sannfæringar um málið og trausti þess að meirihlutinn stæði á bakvið hann gat hann lofað hlutum sem ekki voru á hans valdi að lofa.

ég styð Hjálmar í þessari hugmynd hans um samstarfspólitík og er sannfærður um að hér á skerinu væri margt mun betra ef að okkur bæri gæfa til þess að vinna saman en ekki í sundur eins og nú virðist vera í tísku.  Einnig myndum pólitíkusar minka þann leiða vana að gengisfella allar hugmyndir vegna uppruna þeirra og skoða þær í öðru ljósi.

Samvinna er lykilorðið hér.


mbl.is Guðríður yrði bæjarstjóri
Tilkynna um óviðeigandi tengingu við frétt

Já galið er það...

Í Fjarðabyggð verður krónutalan miðað við þessar forsendur rúmar 800 milljónir eða um 180 þúsund á íbúa.

Á Vopnafirði erum við að tala um 130 milljónir rúmar tæpar 200 þúsundir á íbúa..  Borgarfjörður Eystri greiðir litlar 12 milljónir eða rúm 80 þúsund á íbúa..

Djúpivogur þar falla til 60 milljónir eða um 130 þúsund á íbúa...

Og svona mætti áfram telja..

Ég veit ekki hversu skynsamlegt þetta er.. skattleggja allt í drasl.. og skilja eftir sviðna jörð...

Sjávarbyggðir á Austurlandi frá Vopnafirði að Höfn greiða sem nemur 1,5 milljörðum og um 180 þúsund á íbúa..

Þetta er eiginlega galið eins og segir í fyrirsögn...


mbl.is Útgerðir í Eyjum greiða 1.245 milljónir
Tilkynna um óviðeigandi tengingu við frétt

Þetta er bara bull .....

Og vitleysa.. Það er lítið mál að standa við gefin loforð ef að vilji stendur til þess hjá Ögmundi... Ögmundur fer mikin í nýrri samgönguáætlun og nefnir þar umferðaröryggi og Vestfirði, en ef áætlunin er skoðuð þá kemur í ljós að Vestfirðir fá lítið fjármagn fyrr en á 3 tímabili, (2018-2022) og fækkun einbreiðra brúa sem ætti að vera í algjörum forgangi vegna umferðaröryggis er þar með á sama tímabili..

Síðan eru Norfjarðargööng sett af eina ferðina enn og finnst mönnum það orðið nóg um.  Það er vel hægt að byrja á Norfjarðargöngum strax, ef menn vilja svo við hafa....

Síðasta færsla mín fjallar einmitt um sama mál og þar geta menn skoðað í viðhengi hvernig hægt væri að færa til framkvæmdir þannig að þessu mikilvæga máli sé komið á.

Vilji er allt sem þarf Ögmundur, en ráðherran skortir hann greinilega...

Skoðið endilega viðhengin við síðustu færslu og þá er hægt að sjá hvernig endurraða á framkvæmdum þannig að þetta gangi upp.  Auðvitað eru einhverjir ósammála minni uppröðu rétt eins og ég er ósammála Ögmundar uppröðun, en svona gæti hver og einn sett sín mál í forgang og það væri gaman að sjá fleiri útgáfur í sjálfu sér til að kalla fram umræðu um málið...

Góðar stundir...


mbl.is Ögmundur segir loforðapólitík Kristjáns liðna tíð
Tilkynna um óviðeigandi tengingu við frétt

Núna í lok....

Ársins hefur verið mikil umræða um samgönguáætlun Ögmundar Innanríkisráðherra....

Og sitt sýnist hverjum. Ögmundur vill leggja áherslu í orði kveðnu á Vestfirði vegna þess hversu einangraðir þeir eru og þurfi tengingu innbyrðis og út á við. Einnig talar Innanríkisráðherran um umferðaröryggi og fleira í þeim dúr sé lagt til grundvallar.

Gott og vel, ég deili skoðunum ráðherrans í þessum málum, en fylgja orðunum einhverjar efndir.. ??

Skoðum það aðeins nánar. Áætluninni er skipr upp í 3 tímabil.

Á fyrsta tímabili (2011-2014) eru áætlaðar framkvæmdir fyrir svo lítið sem rúma 12 milljarða. Af því fara tæpir 6 til suðvestur hornsins, Norðlendingar fá 1.2 milljarða í Dettifossveg og afgangurinn skiptist milli Vestfirðinga og landsins alls.. En þarna eru framkvæmdir eins og breikkun á Hellisheiði, göngu og hjólreiðastígar á Sv svæði, Álftanesvegur og malbikun tengivega um land allt ásamt nýjum vegi við Kjálkafjörð.

Ekki fer mikið fyrir rofin einangrunar Vestfjarða í þessari heildarmynd fyrsta tímabils, en smávegis þó. Austurland fær kr 0 á fyrsta tímabili, nema jú kannski eitthvað í formi malbikaðra tengivega.

Næsta tímabil (2015-2018) er heldur stærra. Þar er heildartalan áætluð í vegabótum rétt rúmir 23 milljarðar, sem skiptist á þann hátt að Austfirði fá hæsta framlagið í formi Norðfjarðarganga eða 10,5 milljarða, næst kemur sv hornið með rúma 7 milljarða í sömu verkefni og á síðasta tímabili, Vestfirðir fá 3.2 milljarða í veg um Gufudalssveit, Norðlendingar fá enn framlög í Dettifossveg uppá 600 milljónir og 500 milljónir í nýja brú á Jökulsá Fjöllum og áfram er haldið að malbika tengivegi um allt land.

Síðasta tímabil þessarar merku áætlunar (2019-2022) er á þá lund að Austurlandið fær tæpa 6 milljarða sem skiptast á milli framkvæmda á veginum milli Vopnafjarðar og Þistilfjarðar, Suðurfjarðavegar, Axarvegar, nýr vegur um Lón lítur dagsins ljós og Hornafjarðarfljót fær nýjan veg og brú, en um helmingur af þessum 6 milljörðum fara í þá framkvæmd. Suðvesturhornið fær 13 milljarða rúma sem deilast á sömu verkefni sem áður voru nefnd, ásamt því að nokkrir vegir aðrir eru þar inni s.s. Þingvallavegur Kollafjörður, ný brú við Selfoss, Reykjanesbraut sunnan Hafnarfjarðar fær tvöföldun og nýr vegur um Borgarnes.

Á þessu tímabili má segja að ráðherrann standi loks við orð sín um lagfæringu á samgöngum Vestfirðinga, en alls er áætlað að 14 milljarðar rúmir gangi í vegabætur fyrir vestan og þar vega þyngst Dýrafjarðargöng, Dynjandisheiði og Hjallahálsagöng en um þá framkvæmd er reyndar fyrirvari að verði ekki annar láglendisvegur fyrir valinu verður ráðist í þá framkvæmd.

Á norðurlandi er varla hægt að tala um nein verkefni en 200 milljónir fara þangað alls í Skagastrandarveg og vegin um Skjálfandafljót og við Tjörn.

Aftur komum við að orðum ráðherrans sem talar um rof byggða á Vestfjörðum og öryggi vegfarenda sé haft að leiðarljósi, en á þessu tímabili er gert ráð fyrir breikkun brúa á Suðurlandi fyrir 1 milljarð og áfram verður haldið að malbika tengivegi á landinu öllu.

Þetta er nú öll snilldin, merkilegt plagg þar sem mörg góð og þörf verkefni eru til staðar, það er í sjálfu sér óumdeild, en ágreiningurinn snýst fyrst og fremst um forgangsröðun.

Hér fylgja með í viðhengi pdf skjöl sem sýna fyrst áætlun sem Innanríkisráðiherrann leggur til og síðan er hér sama yfirlit þar sem ég leyfi mér að forgangsraða svona eins og mér sýnist þurfa og það tekst án þess að það þurfi að færa stórkostlega mikið á milli tímabila en örlítið þó.

Þar eru jarðgangaframkvæmdir settar framar, Oddskarðsgöng á fyrsta tímabili og Dýrafjarðargöng á öðru tímabili, einbreiðar brýr á Suðurlandi er komnar á fyrsta tímabil enda gríðarlegt öryggismál þar á ferðinni ásamt því að þetta eru mannaflafrekar framkvæmdir..

En þetta er lítið mál, eflaust má einhverju fleiru breyta en ég hef gert.


Skrár tengdar þessari bloggfærslu:

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband