Enn og aftur af Axarvegi...

Ég hef haft miklar og sterkar skoðanir um Axarveg í gegnum tíðina, og oft hlotið bágt fyrir, sérstaklega hjá frændum mínum og vinum, á mínum uppvaxtarstað Djúpavogi.  Einna harðast í gangrýni á mig, hefur Andrés Skúlason Oddviti Djúpavogshrepps gengið, og stundum hefur mér fundist nóg um, og það jafnvel þó að ég sé frekar lítið hörundssár þegar gagnrýni á mig er annarsvegar.

Ég geri mér vel grein fyrir því að stytting milli Djúpavogs og Egilsstaða verður hvergi meiri en um Öxi, og það þarf ekki að prétika yfir mér um ágæti vegastyttinga þar sem að ég var atvinnubílstjóri í nær 5 ár þá veit ég hversu mikils virði vegstyttingar eru.

En það breytir ekki þeirri staðreynd að Axarvegur er í um 530 metra hæð yfir sjó, og snarbrattur verður hann alltaf að austanverðu, sama hvernig vegurinn verður lagður.  (8% hljóma kanski ekki sem mikill halli en stór hluti af Oddskaðsvegi er 8% og ég þekki fáa sem finnst hann vera jafnsléttur)

En upphafið á þessum pistli mínum átti ekki að vera þetta, heldur ætlaði ég að tala um þann leiða ávana einstakra aðila þegar hitamál sem þetta eru rædd að sveigja frá málefninu og málefnalegri umræðu um það og yfir á persónulegt áreiti (var að hugsa um að nota orðið skítkast en ákvað að vera dannaður) í stað þess að halda sig við málefnin.

Andrés vinur minn er einmitt einn af þeim sem lenda í þessum skurði persónulegs hroða sem ég tel að menn eigi að forðast og halda sig við málefnin.

Tökum dæmi:

"Það verð ég nú reyndar að segja að ég tel mig í mun minni hættu að keyra yfir Öxi í flughálku í dag heldur en að fara langferð með fjörðum og eiga það á hættu að mæta þér á þínum meðalhraða."

Þetta er gott dæmi um málflutning sem er ekki réttlætanlegur á nokkurn hátt, að draga mína persónu og mitt aksturslag inn í umræðu um fjallveg austur á landi.  Hvað á Andrés eiginlega við??   Jú ég hef orð á mér fyrir að keyra frekar í hraðari kantinum en hvað kemur það Axarvegi eiginlega við??   Gæti hann ekki mætt mér á Öxi líka??    Ég keyri þann veg nú stundum, þrátt fyrir að ég eigi að vera sérlegur andstæðingur Axarvegar þá telur teljarinn þar, stundum af mínum völdum.

En tökum annað dæmi:

"Vinnubrögð þín og Guðmundar Þorgrímssonar félaga þíns voru líka fullkomlega opinberuð í þessum efnum á aðalfundi SSA á Hornafirði fyrir tveimur árum, svipuð og jafn ómerkileg vinnubrögð voru uppi þegar þú og Mr. Elísson á Eskifirði stóðuð upp á Aðalfundinum á Reyðarfirði með fáránlegustu tillögu sem flutt hefur verið á Aðalfundi SSA sem gekk bara út að að skaða varanlega vegabóta um Öxi og Skriðdal."

Þarna er Andrés að tala um eitthvað sem ég veit ekki alveg hvað er, þ.e. í fyrra skiptið, varðandi þing SSA.  Þar var ég í samgönguhóp, og ég tel að það hafi verið að stórum hluta mér að þakka að fundarmenn hættu skotgrafarhernaði þeim sem búinn er að viðhafast á þingum SSA undanfarin ár, og fóru í stað þess að vinna eins og menn, en Andrés eignar það allt Birni Hafþóri sínum sveitarstjóra. Ég hef verið talsmaður þess í mörg ár að á fundum SSA færu menn þá leið þegar smgöngur bæri á góma að vinna á svipaðan hátt og löggjafinn gerir, þ.e. að gera samgönguáætlun sem nær yfir fjórðungin allan, og það sem lagt væri til grundvallar væru t.d. öryggi vegfarenda, heilsárssamgöngur og stytting vegalengda. 

Á þingi SSA á Hornafirði var loksins ályktað um vegabætur í fjórðungnum í eitthverju vitrænu formi, en þar töldum við upp allar þær vegabætur sem við sáum fyrir okkur í fjórðungnum, og byrjað var syðst og endað nyrst.  Þetta virðist hafa virkað það vel því að þetta kom nánast óbreytt frá aðalfundi SSA sem haldinn var á Vopnafirði í haust. 

Varðandi tillögu mína og Andrésar Elíssonar, á aðalfundi SSA á Reyðarfirði 2006 þá var hún einföld: "Setjum þá peninga sem ætlaðir eru í endurbætur á Breiðdalsheiði í Axarveg og færum þjóðveg eitt niður um firði. "  Ef þetta var ekki málamiðlun þá veit ég ekki hvað, en þetta mátti ekki ræða, og einhver kom  með frávísunartillögu á þetta í stað þess að leyfa umræður á vitrænum grunni. 

Enn eitt dæmi: 

Umferðin um Öxi hefur því bara vaxið síðustu ár og þá finnst þér Eiður minn einmitt orðið tímabært og eðlilegt að láta bara loka veginum, meira að segja þótt megin umferðin milli mið- austurlands og suðurlands liggi nú um Öxi þegar vegurinn er vel fær öllum bílum.   

  

Ég hef aldrei, og ég endurtek aldrei, sagt að Axarvegi skyldi lokað, heldur hef ég haft efasemdir um öryggi þessa fjallvegs og staðsetningu hans í forgangröðinni í vegabótum hér á austurlandi.

En það má einnig benda á það að þegar talað er um þennan ágæta veg þá fær fólk á tilfinninguna að það sé álíka mikil umferð um Öxi og Reykjanesbraut, en sannleikurinn er allt annar því að ef eitthvað er að marka heimasíðu Vegagerðarinnar er umferð um Öxi 91 bíll á dag að meðaltali yfir árið. 

En til samanburðar keyra 18 bílar um Þórudalsheiði að meðaltali yfir árið og þar er lokað a.m,k. 5 mánuðu á ári, og við Herðubreiðarlindir eru það 36 bílar yfir árið, og þar er vegurinn lokaður frá nóvember fram í júní, og um Suðurfjarðaveg sem á að vera svo til ónotaður þegar Öxi er opin fara 245 bílar að jafnai yfir árið, svo að það er nú ekki sami svakalegi umferðarþungin þarna yfir og menn vilja meina. En ef við berum saman sumarumferð, sem er sanngjarnara þá fara um Öxi 189 bílar á dag en 422 um firði þannig að það er nú ljóst hvar meginnþungi umferðarinnar liggur.

En að lokum, þegar tekist er á um ágreiningsmál svipuð þessum, í guðanna bænum reynum að halda okkur við staðreyndir en ekki persónulegt skítkast, það er betra fyrir alla, og það er öllum hollt að ræða hlutina eins og þeir eru í stað þess að fara með staðlausar staðreyndir.

Góðar stundir

Athugasemdir

[G.Frímann Þorsteinsson (IP-tala skráð) 21.2.2008 kl. 12:29]

Það er ekki glóra í því að leggja miljónir á miljónir ofan í veg yfir Öxi nær væri að leggja þennan pening í að lagfæra veginn með fjörunum

Vegurinn um Öxi verður aldrei heilsársvegur

[Þorsteinn Erlingsson (IP-tala skráð) 21.2.2008 kl. 21:44]

Er ekki munurinn á umferð sem talin er á fjörðum og Öxi einfaldlega sá að um Öxi fer almenni ferðamaðurinn, en það sem telst af umferð á fjörðunum er meira tengt ferðum úr og í vinnu, þeas ekki umferð ferðamanna nema að litlu leyti ?

Hins vegar er rétt að vegurinn um Öxi er hættulegur vegna þess að hann er næstum því nógu góður, hægt er að flengkeyra hann en ef þú mætir bíl óvænt gætirðu verið orðinn morðingi á nokkrum sekúndum, aðallega vegna þess hversu mjór hann er, hef mætt þarna bílum með flennistór fellihýsi á fleygiferð og í fúlustu alvöru hugsað um að skutla mér útaf.

Veginn um Öxi þarf annað hvort að laga strax eða loka honum alveg, það er mín skoðun. 

Nýjar útfærslur af veginum upp austan megin eru þannig að hann verður svipaður og þar sem keyrt er upp úr Jökuldal á leið til Akureyrar það gefur enginn sett út á þá útfærslu ennþá ..

Þá er vetrarumferð þar orðinn raunhæfur og góður kostur fyrir þá sem vilja, amk þá sem þora til Akureyrar gegn um Jökuldal.

Á Öxi eru fáir staðir sem verða ófærir að vetri til og eftir þessar breytingar þá verða þeir horfnir og hægt að halda leiðinni opinni eins og öðrum leiðum á hringveginum og tilvalið að þetta verði þjóðvegur 1

By the way ruslpóstvörnin er nokkuð skondin.

[Eiður Ragnarsson, 22.2.2008 kl. 22:37]

Já Þorsteinn, það er spurningin hvernig á að meta umfeðina, skrítið að einungis fólk á leið til vinnu keyri firði en fólk á leið í Bónus keyri Öxi!!

Þessar tölur sem að ég kem með eru teknar af heimasíðu Vegagerðarinnar og þegar ég tala um umferð um firði þá tók ég tölur við Gautavík (skemmtileg tilviljun) og ég veit nú ekki um marga sem keyra þar um vegna vinnu!!

Þessar tölur segja nú bara allt um það hvar meginumferðin er, meirasegja um sumartíman, þegar allir sem leið eiga um Austfirði keyra Öxi, að sögn sumra....